Դեսպան Կաժոյանի հանդիպումը Լաոսի Ժողովրդական Ժողովրդավարական Հանրապետության ԱԳՆ Եվրոպայի և ամերիկաների դեպարտամենտի գլխավոր տնօրեն Խամֆենգ Դուանգթոնգլայի հետ:

04 դեկտեմբերի, 2023

Ս.թ. դեկտեմբերի 4-ին Լաոսի Ժողովրդական Ժողովրդավարական Հանրապետությունում ՀՀ դեսպան Վահրամ Կաժոյանը (նստավայրը՝ ք. Հանոյ) Լաոս կատարած աշխատանքային այցի շրջանակներում հանդիպում ունեցավ Լաոսի Ժողովրդական Ժողովրդավարական Հանրապետության ԱԳՆ Եվրոպայի և ամերիկաների դեպարտամենտի գլխավոր տնօրեն Խամֆենգ Դուանգթոնգլայի հետ:

Հանդիպման ընթացքում կողմերը քննարկեցին Հայաստանի և Լաոսի միջև քաղաքական, տնտեսական, մշակութային, զբոսաշրջային, ինչպես նաև երկուստեք հետաքրքրություն ներկայացնող այլ ոլորտներում համագործակցության զարգացումն ու խորացումը, բարձրաստիճան և այլ մակարդակների պատվիրակությունների փոխադարձ այցերի կազմակերպումը, Լաոս-Հայաստան բարեկամության ասոցիացիայի հիմնումը, իրավապայմանագրային դաշտի ընդլայնումը և այլ հարցեր։

Զրուցակիցները նաև մտքեր փոխանակեցին Հայաստանի և Լեռնային Ղարաբաղի շուրջ ներկայումս ստեղծված իրավիճակի վերաբերյալ։ Դեսպան Կաժոյանը ներկայացրեց Հայաստանի սահմանամերձ շրջաններում, Լեռնային Ղարաբաղի դեմ Ադրբեջանի ագրեսիայի, շրջափակման ու էթնիկ զտումների հետևանքով ներկայումս ստեղծված իրավիճակը, ինչպես նաև Հայաստանում ապաստան գտած՝ իրենց հայրենիքից բռնի տեղահանված անձանց վերաբերյալ մանրամասներ:

Կողմերը պայմանավորվեցին արագացնել երկու երկրների միջև փաստաթղթերի համաձայնեցման գործընթացն ու ստորագրել արդեն իսկ համաձայնեցված համաձայնագիրն ու փոխըմբռնման հուշագրերը մոտակա պատեհ առիթի դեպքում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր